Mundart Ilsenburg
Mundart
Unse schönet Ilsenborch
Mit siene sessenhallefduusend Inwohner is Ilsenborch nich grade en grotet Prachtstücke von Stadt, awer alltau klein is et ok nich erahn. Wer na uns henkummet, de sall sien Spaß hewwen, un dat nich tau knappe. Da het wei taun Biespeel dä Barje mit samt dän Brocken. Düsse kucket öwwer allet dröwwerwech. Hei is en fründlichen Jesellen, wenn hei nich grade en schlechten Dach erwischet hat.
An saune Da'e schmitt hei mit Rä'en oder ne Hucke Schnei umme seck rummer, hei schüchet mit siene Stormpietsche dä Wulkenpäre oder hei vorrkrupet seck under Newwel un Külle un muult de Lü'e an. Hat einer Glücke, denn allerdings kann hei seck öwwer ne Utsicht bet na Madeborch freuen. Wer bet opp sien Kopp ropperlopen will, de mot seck en Kanten Brot un en Enne Worscht instäken un ne
Kanne vull Tee. Ja kein Schluck nich. Von Schluck kann einer hier oben schwinne dä Fallummije krijjen.
In Ilsenborch is ok Industrie annesiedelt. Hier steiht en modernet Walzwerk, un annere Fabriken, dä Iesenwaren herstellt, sind hier ok tau finn. Bie uns kann einer saugar taukucken, wie dat heite Iesen in dä Formen ejoten wörd.
Von Brocken runn flütt dat Harzbeek, dat siet urohler Tied de "Ilse" eheten wörd. An siene Euwer staht noch dä Reste von dä ganz ohln Fabriken, tau dä wei "Hütten" sejjet. Ohle Mählmöhlen kann einer bie uns bekucken un dat schöne Huus von dat Malerehepaar Crola ok. Bie uns jifft et en Museum, ne Bibliotheke, en Gymnasium un en Park mit veele Bänke. Ne Masse Gräben un Dieke vorrschönt dat Stadtbild ok. Öwwer dä Gasthüser un dä Hotels hejje schon eläset, un in dä Jeschäfte könnt jie köpen, wat jie bruuket.
Nu will eck noch en kleinbetten öwwer dä Ilsenbörschen köddern. De eine un de annere is wie en Timmermann, de en bettjen grow utehacket is. Düsse riet schwinne mal en Hals opp un se sejjet drieste öhre Meinunge. Awer grade opp düsse Lü'e is Vorrlaht. Se meint et ja gut. Annere Minschen jebet seck veel Mäuhe, dat Ilsenborch noch mehr an Schönheit taunimmet. Opp düsse is ok groten Vorrlaht. Wenn nu noch wecke öwwer bliebet, denn sind dä ok ganz passich weil se opp öhre Art un Wiese middemaket. Un is mal en Knörkopp damank, de ehört ämd ok midde datau.
Wer bie uns in Ilsenborch Urlaub maken will, oder wer na uns hentrecket, de find hier dat kleine
Paradies an dat et ümmer wat tau flicken jifft. Ut düssen Grunne sall en jeder Natel un Zwörn middebringen un hei kann bie düsse Flickerie sien Deihl dataujeben. Nich blot rummherstahn un taukucken. Et mot werklich ehrenst emeint sien.
Dit hat de Ilsenbörsche Werner Haberland in dä Huy-Mundart forr jiech oppeschrebben. Un nu truhet jiech hen na uns. Et fritt jiech keiner opp.